(يامغترب عد بلادك)
في اخر الشهر روح بعد ضيق العمل
خميس وجمعه ويوم السبت بدري يعود
روح يخمس ويجمع قصر والقصر حل
سواء بعيد المسافة اوقريب الحدود
يمسح غبار الليالى الماضيه والذحل
وشوقه الفطري المسموح ماله حدود
في مفردة صوته المبحوح ثورة خجل
مثل العرق لاتدلى فوق حمر الخدود
يزرع قبل في خدود الليل يزرع قبل
وبوح صمت المشاعر بين الاربع يسود
حتى ولو كان جيبه حن يروح عطل
لا تحسب ان السعادة كلها فى النقود
قناعة النفس نعمة ويش ماجا أكل
والخير بعد العجاف التسع حتما يعود
ارض السعيدة هواها طب كل العلل
لا خير لاخير فى الغربة ورب الو جود
موجود والمشكلة عنده لها الف حل
لازم تكون الثقة بالله رب الوجود
يامغترب عن بلادك عد اليها عجل
ارض السعيدة مخيرة في حما اوبرود
ارضك ديارك وعزك والحياة والأمل
ارجع بلادك وباتفرش طريقك ورود
ازكا الصلاة في ختام القول كالمستهل
على محمد وآله خير كل الوجود
الشاعر/علي صالح علي الجشاري
