حبة جنون //بقلم الشاعرة // فاطمة حشاد

قصيدة باللهجة المصرية

                            حبة جنون

فيها إيه
لو عشت التغيير
أصلي ما تعودتش
الغلب و التعتير
يجرى إيه
لو نزلت تحت المطر
أجري و اتنطط
من بركة لبركة
و أعطل سير الحركة
أرقص على صوت حليم
أرسم على دكانة عم إبراهيم
أعدي على قهوة عم منير
أتسلطن بغناء سومة
صباحك تيسير
تدعيلي أم بشير
فيها إيه
لو من السلالم
اتزلقت
و زي الشربات
على بدلة عريسي
اندلقت
يجرى إيه
لو أعيش يوم
حالة جنون
و أهو فن من الفنون
ما أنا كده.. أحب التغيير
و أرسم على حيطان الحارة
وردة و فلة لكل جارة
و أهي حبة جنون
مين يوافق
يعيش معاي الجنون؟
كلو يرفع إيده
فيها إيه.. يعني إيه.. يجرى إيه؟

ماهي إلا حبة جنون

بقلمي فاطمة حشاد